ਪੰਜਾਬ ਦੇ ਉਦਯੋਗਾਂ ਨੂੰ ਵੱਡੀ ਰਾਹਤ: PSPCL ਨੇ ਵਾਪਸ ਲਿਆ 5 ਘੰਟਿਆਂ ਦਾ ਬਿਜਲੀ ਕੱਟ

ਲੁਧਿਆਣਾ: ਪੰਜਾਬ ਦੇ ਉਦਯੋਗਪਤੀਆਂ ਲਈ ਵੱਡੀ ਅਤੇ ਰਾਹਤ ਭਰੀ ਖ਼ਬਰ ਸਾਹਮਣੇ ਆਈ ਹੈ। ਪਾਵਰਕੌਮ (PSPCL) ਨੇ ਉਦਯੋਗਿਕ ਯੂਨਿਟਾਂ 'ਤੇ ਲਗਾਇਆ ਗਿਆ 5 ਘੰਟਿਆਂ ਦਾ ਰਾਤ ਦਾ ਬਿਜਲੀ ਕੱਟ ਤੁਰੰਤ ਪ੍ਰਭਾਵ ਨਾਲ ਵਾਪਸ ਲੈ ਲਿਆ ਹੈ। ਇਸ ਫ਼ੈਸਲੇ ਤੋਂ ਬਾਅਦ ਉਦਯੋਗਾਂ ਨੂੰ ਸ਼ਾਮ 7 ਵਜੇ ਤੋਂ ਰਾਤ 12 ਵਜੇ ਤੱਕ ਵੀ ਨਿਰੰਤਰ ਅਤੇ ਨਿਯਮਤ ਬਿਜਲੀ ਸਪਲਾਈ ਮਿਲੇਗੀ, ਜਿਸ ਨਾਲ ਲੁਧਿਆਣਾ ਸਮੇਤ ਪੂਰੇ ਪੰਜਾਬ ਦੇ ਉਦਯੋਗਪਤੀਆਂ ਨੂੰ ਵੱਡੀ ਰਾਹਤ ਮਿਲੀ ਹੈ।

ਤਲਵੰਡੀ ਸਾਬੋ ਗਰਿੱਡ ਦੀ ਸਮੱਸਿਆ ਹੱਲ

ਇਸ ਫ਼ੈਸਲੇ ਦੀ ਪੁਸ਼ਟੀ ਕਰਦਿਆਂ ਸੈਂਟਰਲ ਜ਼ੋਨ ਦੇ ਮੁੱਖ ਇੰਜੀਨੀਅਰ ਜਗਦੇਵ ਸਿੰਘ ਹੰਸ ਨੇ ਦੱਸਿਆ ਕਿ ਤਲਵੰਡੀ ਸਾਬੋ ਗਰਿੱਡ ਤੋਂ ਬਿਜਲੀ ਸਪਲਾਈ ਵਿੱਚ ਆ ਰਹੀ ਤਕਨੀਕੀ ਖਰਾਬੀ ਨੂੰ ਪੂਰੀ ਤਰ੍ਹਾਂ ਹੱਲ ਕਰ ਲਿਆ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ PSPCL ਦੇ ਚੇਅਰਮੈਨ ਦੇ ਨਿਰਦੇਸ਼ਾਂ 'ਤੇ ਉਦਯੋਗਪਤੀਆਂ ਦੀਆਂ ਮੰਗਾਂ 'ਤੇ ਹਮਦਰਦੀ ਨਾਲ ਵਿਚਾਰ ਕਰਦਿਆਂ 5 ਘੰਟੇ ਦੇ ਰਾਤ ਦੇ ਬਲੈਕਆਊਟ ਦੇ ਹੁਕਮ ਰੱਦ ਕੀਤੇ ਗਏ ਹਨ।

ਉਦਯੋਗਪਤੀਆਂ ਦੀ ਮੀਟਿੰਗ ਤੋਂ ਬਾਅਦ ਲਿਆ ਗਿਆ ਫ਼ੈਸਲਾ

ਜ਼ਿਕਰਯੋਗ ਹੈ ਕਿ ਵੱਖ-ਵੱਖ ਗਰਿੱਡਾਂ ਤੋਂ ਬਿਜਲੀ ਦੀ ਮਾੜੀ ਸਪਲਾਈ ਕਾਰਨ ਪਾਵਰਕੌਮ ਨੇ ਪਿਛਲੇ 10 ਦਿਨਾਂ ਤੋਂ ਰਾਤ ਦੀ ਸ਼ਿਫਟ ਦੌਰਾਨ ਉਦਯੋਗਾਂ 'ਤੇ 5 ਘੰਟੇ ਦਾ ਕੱਟ ਲਗਾਇਆ ਹੋਇਆ ਸੀ। ਇਸ ਨਾਲ ਉਤਪਾਦਨ ਪ੍ਰਭਾਵਿਤ ਹੋ ਰਿਹਾ ਸੀ, ਜਿਸ ਕਾਰਨ ਉਦਯੋਗਪਤੀਆਂ 'ਚ ਭਾਰੀ ਰੋਸ ਸੀ। ਉਦਯੋਗਪਤੀਆਂ ਨੇ PSPCL ਅਧਿਕਾਰੀਆਂ ਨਾਲ ਹੰਗਾਮੀ ਮੀਟਿੰਗ ਕੀਤੀ ਅਤੇ ਸੂਬਾ ਸਰਕਾਰ ਨੂੰ ਮੰਗ ਪੱਤਰ ਭੇਜ ਕੇ ਬਿਜਲੀ ਕੱਟ ਰੱਦ ਕਰਨ ਦੀ ਮੰਗ ਕੀਤੀ ਸੀ।

ਪ੍ਰਦਰਸ਼ਨ ਮੁਲਤਵੀ, ਪਰ ਦਿੱਤੀ ਚਿਤਾਵਨੀ

ਪਾਵਰਕੌਮ ਦੇ ਇਸ ਹਾਂ-ਪੱਖੀ ਫ਼ੈਸਲੇ ਤੋਂ ਬਾਅਦ ਵਪਾਰ ਅਤੇ ਉਦਯੋਗ ਸੰਘ ਨੇ ਆਪਣੇ ਪ੍ਰਸਤਾਵਿਤ ਵਿਰੋਧ ਪ੍ਰਦਰਸ਼ਨ ਨੂੰ ਅਣਮਿੱਥੇ ਸਮੇਂ ਲਈ ਮੁਲਤਵੀ ਕਰ ਦਿੱਤਾ ਹੈ। ਹਾਲਾਂਕਿ, ਉਦਯੋਗਪਤੀਆਂ ਨੇ ਸਾਫ਼ ਸ਼ਬਦਾਂ ਵਿੱਚ ਚਿਤਾਵਨੀ ਦਿੱਤੀ ਹੈ ਕਿ ਜੇਕਰ ਭਵਿੱਖ ਵਿੱਚ ਵੀ ਉਦਯੋਗਾਂ ਦੇ ਕੰਮਕਾਜ 'ਤੇ ਮਾੜਾ ਅਸਰ ਪਾਉਣ ਵਾਲਾ ਕੋਈ ਅਜਿਹਾ ਬੇਲੋੜਾ ਫ਼ੈਸਲਾ ਲਿਆ ਗਿਆ, ਤਾਂ ਉਹ ਇੱਕਜੁੱਟ ਹੋ ਕੇ ਪਾਵਰਕੌਮ ਵਿਰੁੱਧ ਮੁੜ ਆਵਾਜ਼ ਬੁਲੰਦ ਕਰਨਗੇ।